ஓடை ஏப்ரல் 2000 தாள் 2
உமாவுக்கு -- கைகாட்டி
அந்த மாலை நேரத்துக்
கதவு தட்டலில்
எதிர்பார்க்கவில்லை
நீயென.
போகச்சொல்லாதீர்கள்
என்றுநீ
சொல்லியிருக்கத் தேவையில்லை.
அத்தனை
பதைப்பிலும்
என் மீதான உன் நம்பிக்கை
உன் கண்களில்.
குழந்தை போல்
அள்ளி அணைத்து
ஆறுதல் சொல்லிடத்
துடித்த மனத்தை
அடக்கத்தான் வேண்டியிருந்தது.
ஆட்டோவில்
அருகிலிருந்த போதும்
பேசுவதற்கு நம்மிடம்
வார்த்தைகளில்லை
உன் புன்னகையே
போதுமானதாயிருந்தது
கரம் பற்றி
விடைபெற்றபோதும்
விட்டுப் பிரிய விரும்பாத
உன் மனம்
தெரிந்தது
அந்த இறுக்கமான பிடிப்பில்.
இரயிலின் திசையில்
ஓடின கால்கள்.
உயிர் உன்னோடு போக
திரும்பத்தான் வேண்டியிருந்தது
உன் கைகாட்டுதலை
மனதில் நிறுத்தி.
கருத்துகள் இல்லை:
கருத்துரையிடுக