சொல் - புலியூர் முருகேசன்
மூச்சறுந்து உடல் கிடக்கும்
பாடையில் சொல்லுக்குப் பயந்து -
துக்கம் விசாரிக்கும் வாய்களெல்லாம்
சொல் சொல்லி
செத்துப் போன உடல் கிழிக்கும் !
நாசி வழிய .... வழிய
சுவாசம் இழுத்து விட
ஏதோ சொல்லித் திட்டப் பார்க்கும்
வழியில் போகிற நாகரிக சொற்கள்.
ஒரு கவளம் சோறு விழுங்கி
மீதிக்கு நீர் குடித்து
திருப்தியுறும் போதில் -
அருவருப்பாய் சொல் நீட்டும்
புளியேப்ப வாய்கள் !
நிர்வாணம் களைந்து
மெய்மூடித் துணி அணிய -
நமுட்டுச் சிரிப்பாய் சுடும் சொற்கள் !
ஒன்றுக்கிருந்தாலும், மலங்கழித்தாலும்
' இதென்ன ' என கேலி பேசும்
அழுக்குப் படியாத வார்த்தைகள் -
கண்திறந்து கண்மூடி சாயும்வரை
சொல்லுக்குப் பயந்தே வாழ்வு நகரும் !
' சொல் ' ஒன்றும் சொல்லாமல்
மூலையில் ஒதுங்கியிருக்கும்
சொல்லுக்குப் பயந்து -.
கருத்துகள் இல்லை:
கருத்துரையிடுக